古勝:形勢混亂 嚴控注碼

古勝:形勢混亂 嚴控注碼 2018年05月31日 00:02Tweet 東網電視更多新聞短片 收息股仍有一定防守力。 古勝在東方產經「MARKET INSIGHT」專欄中表示,美國總統「侵侵」再將中美貿易議題擺上枱,行事反覆的「往績」,股市多少有心理準備,反而意大利殺出個憲制危機,無論大戶抑或散仔都未識反應,惟有抱住投資守則第一條:在唔明朗市況下掟貨揸現金。周二晚華爾街笠笠亂,道指曾跌逾400點。期指結算日港股先嚟大冧檔,低開後全無反撲之力,一度失守三萬關的恒指,最終跌427點報30,056點,跌市成交反而回升到1,097億元,反映近期基金買就細細注,沽就大大手的新玩法。今年股市最大的反高潮,都應該係周五正式入摩的A股,今年唔單止跑輸全球大部分主要股市,入摩前夕,周三插落3,041點平咗今年個低位,肉酸到無以復加。想搵鬼佬托市結果事與願違,仲想奢望入摩炒起A股,北水又會落嚟托住港股,睇近排南下北水大為收斂,睇嚟六絕月個市都係無乜計。意大利出事,皆因總統否決疑歐派人選擔任財長,阻止控制國會的民粹政黨組閣。如果短期總統無被彈劾,最快要到7、8月先會有重選,但目前疑歐派民意支持度過半,牌面上即使再選都係照贏。發展落去,IMF與歐盟都想意大利聽聽話話慳啲使,暗裏個算盤恐怕都想短期意大利愈亂愈妙,等到支持右翼思潮,反對繼續遵守歐盟財政約束的意大利民眾開始火燒到肉知痛,扶親歐盟陣營政黨重新執掌國會。喺2011年,一個歐洲小國希臘賴債,搞到歐盟幾乎解體收場。作為歐洲第四大經濟體系,意大利殺傷力更大。公共債務排名全球第三,舊年破紀錄去到2.3萬億歐元,國債等於全國GDP的130%。假如希臘對歐盟是黃色炸藥,意大利絕對係核武級數,將成個歐盟炸爛。今年環球股市無方向,牛皮悶局最容易令人胡思亂想,往最壞方向猜度劇情發展。周二晚開始有人估6月中美國聯儲局未必加到息,十年期美債孳息率插至2.76厘,與兩星期前高位3.1厘回落近一成一,反映唔止股市,債市一樣笠笠亂。近排留意到積弱的垃圾債券,並無因為長息回順反彈,反映債商風險胃納依然吃緊,本地亦見愈來愈多中資公司發債計劃泡湯。歐洲愈亂、美金愈強,新興市場走資短期應該唔會逆轉,古勝實在睇唔通短期可以點收科!風高浪急下,惟有勸股民孖展可免則免,注碼控制在自己舒服水平(輸都唔會肉痛嗰隻)。或者至多買吓極穩陣收息股,好似恒生銀行(00011)、中電(00002)、置富產業信託(00778)等吓運到,甚至疊埋心水放假,等世界盃開鑼,睇完一個月波或者思緒清晰番,到時世界或不再一樣。─ ─ ─ ─ ─ ─ 「東網Money18」全新功能「貼市貼士」,助你掌握投資先機http://bit.ly/2sLtGDm 「互聯餘額」數據,助你掌握北水動向 http://money18.on.cc/connect/dqb.html

分享更多閱讀請至以下|葉黃素|神經滋養物質|維力康|台灣綠蜂膠|磷蝦油|超視王|芙婷寶|PPLS|健康食品|蜂王漿|蜂王乳|保健食品|網站排名|關鍵字排名|智勝王|南極冰洋磷蝦油|SEO|GOOGLE排名

發表迴響

你的電子郵件位址並不會被公開。 必要欄位標記為 *