希古恩12碼宴客 祖記放生熱刺陷劣勢

希古恩12碼宴客 祖記放生熱刺陷劣勢 2018年02月14日 05:36Tweet 東網電視更多新聞短片 (Getty Images、法新社圖片) 即睇全場精華:http://bit.ly/2CifHty 本身可以做英雄,但轉個頭竟變敗家仔,希古恩唔通條命就係咁?歐聯16強首回合,祖雲達斯主場迎戰熱刺,開波唔夠10分鐘呢名阿根廷射手就梅開二度,但佢於稍後時間浪費2個黃金入波機會,當中包括12碼宴客,打起熱刺信心,最終客軍憑哈利卡尼同基斯甸艾歷臣建功,戲劇性逼和斑馬兵團2:2,有2個作客入球攞番優勢,熱刺堅要多謝希古恩。上半場開波2分鐘,祖雲達斯已經憑一個靚波打開紀錄,比真歷開出罰球,希古恩無人看管下,轉身凌空抽遠柱,洛里斯雖然摸到個波,但皮球依然入網,斑馬兵團火速領先1:0。之後主隊貝拿迪斯治,於禁區內快賓戴維斯一步篤到個波,賓戴維斯就一腳踢落個人度,球證直指12碼點,希古恩操刀勁射門將右下角,洛里斯捉到路又掂到個波,可惜力度太勁只能叉咗入網,祖記唔夠10分鐘就領先2球。熱刺之後狂攻,祖記縮後處於捱打局面,基斯甸艾歷臣弗到爆,斬個靚波入禁區盲眼位,哈利卡尼衝到一頂,但角度太正畀保方撲出。之後主隊打反擊,希古恩禁區內睇定左腳一抽,以為入硬點知柱邊出界。哈利卡尼之後終替熱刺入波,迪利阿里畀個靚直線,哈神突破越位陷阱,推過埋出迎嘅保方左腳射入,攻入重要作客入球。完半場前杜格拉斯哥斯達左路硬爆出禁區,奧利亞衝動鏟跌對手,球證再畀12碼,但希古恩今次怒射中路中楣,半場主隊僅領先2:1。換邊後熱刺繼續有優勢,71分鐘客軍於禁區頂逼到罰球,艾歷臣右腳怒轟,保方被視線所阻落地稍慢救唔番,熱刺追成平手。祖記雖有主場之利,但下半場僅有貝拿迪斯治右路CUT入中路起左腳勁射最有威脅,但都畀洛里斯成功神救,最後雙方戰平2:2,祖雲達斯如於次回合未能入球,就會被熱刺淘汰。另一方面,英超一哥曼城16強又踢成點?即刻延伸閱讀:【大超班】根度簡省兩粒 曼城炒起巴素利http://bit.ly/2BWHzYG 即上英超刨績王:http://win.on.cc/epl 東網體育同你追實體壇每個精彩時刻! https://goo.gl/ewVpvE 

分享更多閱讀請至以下||||||||||||||||||

發表迴響

你的電子郵件位址並不會被公開。 必要欄位標記為 *