政Whats噏:政府重研立會劃新界北區 勢打崩頭

政Whats噏:政府重研立會劃新界北區 勢打崩頭 2018年02月12日 22:40Tweet 東網電視更多新聞短片 如果真係落實劃新界北區嘅話,睇嚟建制同泛民為爭議席勢打崩頭。(設計圖片) 政府早喺上屆立法會時研究過,將目前5個選區重新執過,當時已傳出唔同方案,包括增至9個選區、開拓新界北選區等,但計劃最終未有落實,只係將部分選區嘅議席數目微調。但據聞政府近期已重啟劃區計劃,陸續與唔同政黨會面聽意見,而建制派亦都展示出願意傾嘅態度,但就認為點劃區都好,都唔好趕喺2020年時實施喇!如果真係落實劃新界北區嘅話,睇嚟建制同泛民為爭議席勢打崩頭。現時立法會地區直選分成5大選區,當中嘅新界東同新界西就各有9個議席,而隨住香港人口北移,新界人口近年都持續上升,相反香港島人口就下跌,所以按照人口比例,的確有需要作出調整,而今屆立法會就已經將議席微調,港島區由7席減至6席,多出嘅1席則撥落九龍西。不過,受到《立法會條例》所限,每個地方選區法定議席上限為9席,即使目前人口比例與議席數目不符,都無辦法作再調整各區議席去增加新界東同新界西嘅議席數目,所以就引申出重新劃區嘅考慮。據了解,政府已陸續向唔同政黨了解對劃區嘅睇法,初步建制派都認同劃區嘅需要,願意同政府坐低傾,但佢哋就對幾時實行劃區有較大嘅意見,普遍認為唔可以趕於2020年換屆選舉實行,因為時間緊迫,未能為選舉工程做足準備功夫囉!立法會雖已經修改《議事規則》,理論上議事效率有所提高,但現時已經係2018年,立法會又要處理廣深港高速鐵路一地兩檢方案同《國歌法》本地立法工作,相信選區劃界一事,最快都要今屆任期尾先能夠獲得通過,如果通過就立即實施,建制派即使現時開始部署劃區後嘅選舉工程,兩年時間仍然不足,因為需要研究派人、拉票等,又要選民適應,所以建制派共識就係,劃區可以先喺今屆立法會通過,但實施就應該留待再下一屆嘅選舉,即2024年先推行,令所有候選人都清楚參選下屆後就要於4年後再執位。話時話,民建聯嘅劉國勳係立法會區議會(第一)功能界別嘅議員,民主黨新界東議員林卓廷都係北區區議員,若果劃新界北區嘅話,佢哋都有可能會轉區出選,大家不妨放長雙眼睇吓。其實以往亦傳出多個劃區方案,始終議席分布牽涉利益問題,各個政黨必定由自身利益去提出建議,所以目前就實施時間就算有共識,最終成唔成功推動劃區都係未知之數。

分享更多閱讀請至以下||||||||||||||||||

發表迴響

你的電子郵件位址並不會被公開。 必要欄位標記為 *