政Whats噏︰區會億元項目爛攤 CY被轟禍首

政Whats噏︰區會億元項目爛攤 CY被轟禍首 2017年12月21日 22:43Tweet 東網電視更多新聞短片 梁振英推出的18區億元撥款「社區重點項目計劃」進度緩慢,已變成爛攤子。(設計圖片) 前特首梁振英(CY)於2013年發表其首份施政報告,提出向18個區議會各撥款1億港元推行「社區重點項目計劃」,事隔近5年,呢個億元重點項目大計如蝸牛般緩慢發展,據報18區共23項撥款,當中只有3項搞掂投入運作,其餘仲停留係陸續開展階段,另外觀塘等3區嘅億元項目更慘,呢一刻仲喺立法會走程序,仍未取得所需撥款,有泛民議員於立法會炮轟CY係當年領導嘅政府推出計劃時冇指引方向,搞到區會拗餐懵。其實億元項目淪為一個尾大不掉嘅爛攤子,被指係罪魁禍首嘅CY依家拍拍屁股下台,現屆政府真係有排執手尾同追進度嘞!每區1億港元嘅社區重點項目計劃於2013年初曝光,經過近5年時間,唔單止區議會換咗屆,連特首都換埋,但距離全部完成仍然係漫漫長路,直至今日,仍有3個區會嘅億元項目仲等緊過幾關,以便盡快到立法會財務委員會申請並獲批撥款,因此,以上3個區會最終攞唔攞到錢展開工程或服務仲係未知之數。話說立法會民政事務委員會今日(21日)就開會,討論呢3個區會嘅4個社區重點項目,包括觀塘海濱音樂噴泉、灣仔興建摩頓臺活動中心、及南區為期5年嘅一次性眼科檢查,為行動不便人士提供穿梭巴士或復康巴士接載往公立醫院及醫療機構服務。民政事務局局長劉江華透露,18個區議會中有23項撥款已獲支持,而23項已批撥款中就只有3項係已經投入運作,即黃大仙廣場擴闊工程、屯門青少年發展計劃、及葵青區嘅眼科、牙科健康評估。換言之,只有略多於一成已獲撥款嘅項目,市民係享用緊有關設施或受惠於相關服務,有關比例相當低。講番今日向民政事務委員會闖關嘅3個區會嘅億元項目,其中觀塘及灣仔嘅億元項目早前畀泛民拉布拉死,直至今日再捲土重來「過三關」,多名建制派發言時有矛頭指向泛民拉布,甚至係越俎代庖,即有意以立法會平台推翻區議會已達成嘅共識。不過呢個世界係冇無緣無故嘅爭拗,有泛民議員認為罪魁禍首係CY,正如本身係社工嘅張超雄話齋,CY當年冇啦啦推出計劃,加上每區獲撥款1億港元數目唔細,當局又冇指引啲錢點用,包括應該應用於硬件工程定軟件服務都唔知,搞到區議會「打餐死」,直斥呢個係CY嘅「重點缺失」。會上最令人意想不到嘅係,多名建制派議員竟然要求現屆政府「加碼」,再推新一輪億元項目,甚至係恒常化,以後每屆區議會都獲撥款搞億元項目,完全無視經過近5年時間,首批億元項目嘅進度仍然係慘不忍睹。還記得CY當年將「地區問題,地區解決」等口號講到天花亂墜,到頭來只係徒添地區爭拗,進一步激化撕裂對立,依家留低嘅億元項目爛攤子,現屆政府真係多得CY呢個帶挈唔少,因為一旦未執好手尾同搞掂項目,都咪使旨意有政治空間再開展類似計劃嘞!

分享更多閱讀請至以下|南極冰洋磷蝦油|網站排名|磷蝦油|GOOGLE排名|健康食品|SEO|PPLS|葉黃素|芙婷寶|智勝王|蜂王乳|明亮寶|超視王||關鍵字排名|蜂王漿|

發表迴響

你的電子郵件位址並不會被公開。 必要欄位標記為 *